Bu gün nəhayət ki, milli istiqlalçılar özlərinə yeni sədr seçə biləcəklər. Heç bir problem olmasa, AMİP qurultayını keçirib, ikiillik sədrsizliyə son qoyacaq...

   Azərbaycan Milli İstiqlal Partiyası iki ildən sonra axır ki, qurultayını keçirməyə müvəffəq olacaq. Bundan əvvəl partiya ali tədbirini keçirməyə çox cəhd göstərmişdi. Amma ya zəlzələdənmi, ya vəlvələdənmi qurultay alınmırdı ki, alınmırdı. Hər dəfə bir əmma çıxıb partiyanın işinə əngəl olurdu. Şükürlər olsun ki, bu dəfə milli istiqlalçılar bütün problemləri adlaya bildilər və bu gün "Avropa" otelində qurultaylarını keçirib, özlərinə sədr seçə biləcəklər.

   Allah heç bir partiyanı başsız qoymasın. İki il sərasər AMİP də sədrsizliyin acısını çəkdi. Milli istiqlalçılar bu iki ildə sədrli qurumlara baxıb köks ötürməkdən yoruldular. Yenə Allaha şükür ki, bu gün partiyanın yeni sədri kreslosunda oturub, ailə başçısı kimi AMİP-çiləri bir yerə yığa biləcək.

   Hər bir partiyanın qurultayından qabaq hamı təşkilata kimin sədrlik edəcəyi ilə maraqlanır. Elə "AMİP-in yeni sədri kim olacaq" sualı da uzun müddətdir ki, kluarlarda dolaşmaqdadır. Düzdür, partiyadan bu suala cavab almaq istəyəndə həmişə "sədr olmağa layiqlilər çoxdur" deyirlər. Amma qəribə orasıdır ki, layiqlilərdən heç kəs indiyənəcən iddiasını ortaya qoymayıb. AMİP-dən buna da aydınlıq gətirirlər. Ki, namizədlər qurultay başlayana kimi öz güclərini hesablayacaqlar, situ-asiyanı dəyərləndirəcəklər. Ola bilər ki, öz namizədliklərini irəli sürsünlər, ola bilər digərlərinin namizədliklərini dəstəkləsinlər. Siyasətdə hər şey mümkündür.

   Namizədlər sırasında baş katibdən başlamış bir neçə nəfərin adı çəkilir. Amma ən şanslısı eks-deputat, keçmiş YAP-çı, sabiq ADP-çi, MSK-nın keçmiş üzvü (maşallah, adam "eks"lərlə zəngindir), indi AMİP-də beynəlxalq məsələlər üzrə katib postunda çalışan Yusif Bağırzadə görünür. Əslində, bu adam AMİP-ə üz tutanda çoxları onun əvvəl-axır partiyanın başına gətiriləcəyini deyirdi. Düzdür, onda da, elə indi də partiyadakılar bunu danmayıblar: "AMİP üzvü olan hər bir şəxs sədrliyə namizədliyini irəli sürmək hüququna malikdir. Eləcə də Yusif Bağırzadə", - deyərək, üstəlik onun sıravi üzv yox, Siyasi Şuranın üzvü, eyni zamanda katib olduğunu bildirirlər. Yəni, başqalarına baxanda sədrliyə gedən yolda bu adama yaşıl işıq yanır.

   Nəsə, yeni sədrin kim olacağının əhəmiyyəti yoxdur. Təki AMİP əvvəlki nüfuzunu özünə qaytara bilsin...