12:11 01-09-10
ABŞ prezidenti Barak Obama hərbçilərə İraqdakı xidmətlərinə görə minnətdarlıq edib. O xatırladıb ki, İraqdan qoşunların çıxarılmasından sonra da terrorla müharibə başa çatmayıb: "Siz İraqda hədsiz vacib iş görmüsünüz. Bu, çətin missiyadır. Biz böyük itkilər vermişik. Ona görə ki, bir ençə düşmənə qarşı müharibə aparırıq: Əl-Qaidə, Taliban və onların müttəfiqləri. Bundan sonra da çətin olacaq. Amma mən bir şeyi dəqiq bilirəm ki, 11 sentyabrdan sonra ölkəmiz birləşib və biz bu cinayəti törədənlərə qarşı mübarizə aparmaq niyyətindəyik. Biz əmin olmalıyıq ki, düşmənlərimiz heç bir yerdə özlərini təhlükəsiz hiss etmirlər. Bu isə o deməkdir ki, gələcəkdə də qurbanlar və kədər görəcəyik". Barak Obama bu sözləri Fort-Bliss hərbi bazasındakı çıxışında deyib. O, bazaya qısamüddətli səfəri çərçivəsində amerikalı hərbçilər və onların ailələri görüşü.

   

   Barak Obama İraq hakimiyyətini hökumətin formalaşdırılmasını davam etdirməyə və bu işi mümkün qədər tez başa çatdırmağa çağırıb: "Ümid edirik ki, hökumət çoxluğun maraqlarını təmsil edəcək və demokratik ideyaları bölüşəcək. Biz şadıq ki, İraq təhlükəsizlik qüvvələri son bir-iki il ərzində ölkədəki vəziyyətə görə məsuliyyəti öz üzərinə götürüb. ABŞ onların təhlükəsizliyi təmin etmək bacarığına inanır".

   

   Qeyd edək ki, ABŞ avqustun 31-də İraqdakı fəal əməliyyatlar fazasını başa çatdırıb və bu ölkədəki kontingentin böyük hissəsini çıxarıb. Hazırda İraqda 50 mindən az amerikalı hərbçi qalıb. Onların əsas vəzifəsi İraq təhlükəsizlik qüvvələrinə təlim keçməkdən ibarətdir. Barak Obamanın bir neçə saatdan sonra hərbi kontingentin İraqdan çıxarılması ilə bağlı xalqa müraciət edəcəyi gözlənilir.

   

   EKSPRESS.AZ