12:15 01-09-10
Azərbaycan tərəfi BMT Baş Assambleyasının sentyabrın 9-da keçiriləcək növbəti sessiyasında "İşğal olunmuş ərazilərdən məcburi köçkün düşmüş insanların hüquqları və onların təmin edilməsi" ilə bağlı yeni qətnamə ilə çıxış edəcək. Azərbaycan torpaqlarının hələ də işğalda qalması bu məsələni zəruriləşdirməklə yanaşı, beynəlxalq ictimaiyyətin problemin həllində mövqeyini dəqiqləşdirməsi baxımından da əhəmiyyətlidir.

   

   Politoloq Rasim Musabəyov məsələ ilə bağlı bildirib ki, işğal olunmuş torpaqlar, oradan qovulmuş 600 mindən çox insan var və Ermənistan məsələyə yalnız ermənilərin təhlükəsizliyi və statusu kimi baxır: "Azərbaycan diqqəti bu məsələyə cəlb etməklə, Assambleyada erməniləri çətin vəziyyətə salmış olacaq".

   

   Xarici İşlər Nazirliyinin mətbuat katibi Elxan Poluxov da hesab edir ki, yeni qətnamə ortada yeni vəziyyət yaratmaqla yanaşı, dünya dövlətlərinin insan hüquqlarına münasibətini müəyyənləşdirir, eyni zamanda Dağlıq Qarabağ münaqişəsinin sülh yolu ilə ədalətli şəkildə həll olunmasına dair yanaşmaları da aydınlaşdıracaq.

   

   "Dünya ictimaiyyəti, dövlətlər beynəlxalq hüququn norma və prinsiplərinə əməl edərək öz prinsipial mövqelərini nümayiş etdirəcəklər, çünki belə vəziyətdə ikili standartlara yol vermək sülhün əldə edilməsinə xidmət etmir. Qətnamələrin qəbul olunması, həqiqəti dünya ictimaiyyətinə çatdırmaqla paralel olaraq eyni zamanda ədalətli mövqeyin bir daha dəstəklənməsi deməkdir",- deyə XİN-nin mətbuat xidmətinin rəhbəri Elxan Poluxov bildirib.

   

   Xatırladaq ki, 2008-ci ildə səsveməyə çıxarılmış "Azərbaycanın işğal edilmiş ərazilərində vəziyyət" adlanan qətnamənin lehinə Minsk qrupuna üzv 13 ölkədən yalnız Türkiyə səs vermişdi. Minsk qrupuna həmsədrlik edən ABŞ, Fransa və Rusiya, eləcə də Hindistan guya qətnamənin birtərəfli hazırlandığını əsas gətirərək onun əleyhinə çıxış etmişdilər. Həmin qətnamədə isə Azərbaycanın beynəlxalq səviyyədə tanınan sərhədləri çərçivəsində ərazi bütövlüyünə dəstək verilir, işğal edilmiş bütün ərazilərdən Ermənistan silahlı qüvvələrinin tam və qeyd-şərtsiz çıxarılması tələb edilir və məcburi köçkünlərin öz yurdlarına qayıtması üçün müvafiq şəraitin yaradılması vurğulanırdı. Ötən il isə sözügedən qətnaməni BMT Baş Assambleyasında müzakirəyə çıxarmaq mümkün olmamışdı. İndi isə bu qətnamə ilə yanaşı həmsədr dövlətlərin səsvermədə manevr imkanlarını məhdudlaşdıran yeni sənəd müzakirəyə çıxarılacaq ki, artıq bununla bağlı Ermənistan ultimatum xarakterli bəyanatlar səsləndirməyə başlayıb.

   

   Qeyd edək ki, sessiyaya sədrlik edən Liviya Azərbaycan və Kosovo ilə bağlı məsələləri eyni gündə müzakirə etməyi təklif edib.

   

   EKSPRESS.AZ