14:15 01-09-10
Bir neçə gündən sonra Bakıda İqtisad Məhkəməsində media ilə bağlı daha bir məhkəmə çəkişməsinə başlanılacaq.

   

   Bu dəfə iddiaçı qismindəı çıxış edən Azərbaycan Rabitə Nazirliyinin "Teleradio" istehsalat birliyi , necə deyərlər ittiham olunan isə "Avropa Plyus Bakı" radioşirkətidir.

   

   Rabitə və İnformasiya Texnologiyaları Nazirlyinin "Teleradio" İstehsalat Birliyinin rəhbəri Əflatun Şərifovun verdiyi məlumata görə, mübahisənin predmeti 2009-cu il yanvarın 1-dən dayandırılan Rusiyanın" Avropa-plyus-Bakı" radioşirkətinin nazirliyə olan 9 min manat həcmində borcudur.

   

   9 min manat bir şirkət üçün elə də böyük məbləq deyil. Məsələ ilə bağlı razılığa gəlmək olmazdımı sualına cavabında isə Rabitə Nazirliyi rəsmisi bildirdi ki, dəfələrlə buna cəhd edilib . Amma əlləri boşa çıxıb.

   

   Məhkəmədən nəyin tələb edilməsinə gəlincə isə Əflatun Şərifov söylədi ki, onlar ya pullarının qaytarılmasını, ya da avadanlıqla əvəz edilməsini istəyir.

   

   Rusiyanın "Avropa plyus Bakı" kanalı rəsmiləri ilə əlaqə saxlamaq üçün onların Bakıdakı ofisinə gün ərzində bir neçə dəfə zəng vursaq da dəstəyi götürən tapılmadı. Məhkəmə isə sentyabrın 2-də İqtisad Məhkəməsində hakim Tahir Əsədovun rəhbərliyi ilə keçiriləcək.

   

   Avropa plyus Bakı radioşirkəti 107.7 FM tezliyində yayılırdı və musiqili proqram kimi dinləyici auditoriyası toplamışdı. Xarici radio şirkətlərin yerli tezliklərdə yayımının dayandırılması barədə qərardan sonra BBC, Azadlıq , Amerikanın səsi radioları ilə bərabər onların da tezliyi əllərindən alınıb.

   

   Ekspertlərin fikrincə, hökumətə olan borclarını ödəməsələr elə avadanlıqları da əllərindən gedə bilər.

   

   EKSPRESS.AZ