14:30 01-09-10
Redaktorlar bu radionu "qeyri-azad ölkədə azadlıq adası" adlandırırlar.

   

   90-cı illərdə Sovet İttifaqının dağılmasından sonra təsis edilmiş bu radio-kanal Rusiyanın yeganə müstəqil radiosu sayılır.

   

   Hökuməti açıq tənqid edən Exo Moskvı dəfələrlə bağlanıb, lakin yenə də efirdə qala bilib.

   

   Şəhərin mərkəzində yerləşən "Exo Moskvı" radiosunun redaksiyasına daxil olanda, nəzərə ilk növbədə, divarlardan asılmış fotoşəkillər çarpır.

   

   Bu, son 20 il ərzində radioya müsahibə vermiş prezidentlər, baş nazirlər, ulduzlardır: Mixail Qorbaçov, Toni Bleyr, Bill Klinton, çox cavan görünən Vladimir Putin, habelə Layza Minelli.

   

   "Exo Moskvı" radiosunun təsisatçısı Sergey Bantman:

   

   "Vəziyyət çox ağırdır, çünki hökumət kütləvi medianın rolunu başa düşmür. Onlar Sovet dövründə olduğu kimi belə fikirləşirlər ki, kütləvi media - siyasi təbliğat alətidir. Əfsus ki, jurnalistlərin çoxu da özlərini siyasət aləti hesab edirlər. Jurnalist - jurnalistdir, hər hansı bir şirkət və ya hökumətin PR menejeri deyil..."

   

   "Exo Moskvı" radiosunun mövcudluğu özü-özlüyündə Rusiya üçün qeyri-adi bir haldır. Bəziləri hesab edirlər ki, bu kanal Kremlə "Rusiyada azad media var" iddiası ilə çıxış etməyə imkan verir.

   

   Bundan başqa, ölkə boyunca 3 milyondan az dinləyicisi olan bu kanal özünün mübahisəli rəyləri ilə hökuməti sarsıda bilən bir qüvvə kimi qəbul olunmur. Lakin radiostansiya səhmlərinin 60 faizindən çoxu dövlət Qazprom şirkətinə məxsusdur. Belə bir halda kanal həqiqi mənada tam müstəqil ola bilərmi? Yenə də Sergey Buntman:

   

   "Biz Qazpromun zavodunda tətil, Rusiya-Ukrayna, Rusiya-Belarus münasibətləri, qaz müharibələri barədə xəbərlər yayırıq. Dinləyicilərə xəbərlər çatdırırıq. Münaqişənin hər iki tərəfinin mövgeyini işıqlandırırıq. Bu barədə danışmağa imkan yaradırıq. Və Qazprom barədə xəbər yayırıqsa, biz bu şirkət haqqında səhmdar kimi düşünmürük. "

   

   Rusiya-Polşa münasibətlərinə aid bu efir müzakirəsindən belə qənaətə gəlmək olar ki, "Exo Moskvı" radiosu üçün qeyri-mümkün mövzular və ya rəylər yoxdur. Rusiyanın televiziya sənayesi ola bilsin ki, dövlətin nəzarəti altındadır. Lakin azı bir radiokanal var ki, onun səsi ucadan eşidilir...

   

   EKSPRESS.AZ