11:30 02-09-10
Rusiya Federasiyasının prezidenti Dmitri Medvedev sentyabrın 2-3-də Azərbaycana səfəri çərçivəsində ikitərəfli ticari-iqtisadi əməkdaşlağı, eləcə də, Xəzərdə tərəflərin qarşılıqlı əlaqələri məsələlərini müzakirə edəcək. Bunu jurnalistlərə Rusiyanın dövlət başçısının köməkçisi Sergey Prixodko deyib. Onun sözlərinə görə, səfər zamanı dövlət sərhədi ilə bağlı müqavilə, eləcə də transsərhəd Samur çayından rasional istifadə və su resurslarının mühafizəsi ilə bağlı saziş imzalanacaq. Sergey Prixodko bildirib ki, Azərbaycan Rusiyanın dövlət sərhədi haqqında müqavilə bağladığı ilk ölkə olacaq.

   

   Su ehtiyatlarından danışan prezident köməkçisi deyib ki, imzalanadaq sənəd Samur çayının paritet əsaslarla bölünməsini birgə həyata keçirəcək Rusiya-Azərbaycan komissiyasının yaradılmasını nəzərdə tutur: "Bu sənədlər ölkələrimiz arasında strateji müttəfiqlik münasibətlərinin əsasını təşkil edəcək, Qafqazda sabitlik və təhlükəsizliyin möhkəmlənməsinə töhfə verəcək".

   

   Sergey Prixodko bildirib ki, iki ölkə arasında ticari-iqtisadi əməkdaşlıq məsələsinə də xüsusi diqqəit ayrılacaq. 2009-cu ildə Rusiya və Azərbaycan arasında mal dövriyyəsi 1,78 milyard dollar olub.

   

   Beynəlxalq məsələlərə gəldikdə isə, Rusiya prezidentinin köməkçisi deyib ki, dövlət başçıları Dağlıq Qarabağ münaqişəsi, eləcə də Xəzərdə beynəlxalq əməkdaşlıq məsələlərini müzakirə edəcəklər.

   

   Sergey Prixodko Dmitri Medvedevin Azərbaycana səfər proqramını da açıqlayıb. Rusiya prezidenti Bakıya bu gün gələcək. O, Fəxri xiyabanda Heydər Əliyevin məzarını vəŞəhidlər xiyabanını ziyarət edəcək. Bu gün Rusiyanın dövlət başçısının şərəfinə şam yeməyi veriləcək.

   

   Sentyabrın 3-də Azərbaycan və Rusiya prezidentləri əvvəlcə təkbətək, sonra isə geniş tərkibdə danışıqlar aparacaqlar. Danışıqlar sənədlərin imzalanması ilə başa çatacaq.

   

   Dmitri Medvedev Bakı Dövləçt Universitetində də olacaq. Ona bu ali təhsil müəssisəsinin fəxri doktoru diplomu təqdim ediləcək.

   

   Rusiya prezidentini səfərdə köməkçisi Sergey Prixodko, baş nazirin müavini Aleksandr Xloponin, xarici işlər naziri Sergey Lavrov, energetika naziri Sergey Şmatko, bəzi regionları, o cümlədən Dağıstan və İnquşetiyanın rəhbərləri, iş adamları, o cümlədən, "Qazprom"un başçısı Aleksey Miller müşayiət edəcək.

   

   EKSPRESS.AZ