Əvvəllər "sel qaçqınları"na heç olmasa, vədlər verirdilər, onlar da hökumətin verəcəyi kompensasiya ilə özlərinə yurd-yuva quracaqlarına ümid edirdilər. İndi day o vədlər də verilmir, əvəzində evi-eşiyi suyun altında qalanlar hədə-qorxuya məruz qalırlar...

   Bu gün-sabah yay fəsli başa çatacaq, amma Kürün kürlüyü nəticəsində evləri suyun-selin altında qalan camaat hələ də çöllərdə qalıblar. Düzdür, arada onların da Kür kimi coşub-daşmaqları olur, düşürlər yolun ağına gəlirlər Bakıya ki, başbilənlərimizə dərdlərini desinlər. Amma kimdi onları eşidən. Eşidən olanda da ancaq və ancaq quru vədlər verir, ay bağ belə, bostan belə ki, bəs hökumət evi su altında qalan ailələrə yardım edəcək, kompensiyaya ayıracaq, siz də həmin pulla özünüzə təzə yurd-yuva salacaqsınız. "Yeməkdənsə ümid yaxşıdır" deyən "sel qaçqınları" da elə belə vədlərə inana-inana günlərini boşa verirlər. Amma fəsil gözləmir, yağışlı payız gəlib qapını kəsdirəcək, ondan sonra qarlı-boranlı qış gələcək, di gəl, ay evi dağılmış camaat, özünüzə ev qaraldın görüm, qaralda biləcəksinizmi?

   Hökumətin vədlərindən bir şey çıxmadığını görən Sabirabadın "sel qaçqınları" bugünlərdə yenə Bakıya gəlib Prezident Administrasiyasında dərdlərinə dərman axtarıblar. Gəldikləri kimi quru sözü də özlərinə yoldaş edib geri qayıdıblar.

   Qayıdan kimi də yerli icra hakimiyyəti başçısının qəbulunda olan sakinlər deyirlər ki, rayonun başbilənləri onlara dəyən zərərə görə kompensasiyanın verilməsinin real müddətini və ədalətli həcmini müzakirə etmək əvəzinə, görüşə hədə-qorxu ilə başlayıb. Üstəlik rayonun prokuroru Seyfulla Aslanov deyib ki, açıq qulağınızı məni yaxşı-yaxşı dinləyin, adambaşına 200 manat məbləğində birdəfəlik kompensasiyadan imtina edilməsi şantajdır. Hələ bu harasıdır? "Sel qaçqınları" and-aman edirlər ki, bəs prokuror "səbəbkarların" (yəni İcra Hakimiyyətinin nümayəndələri ilə görüşə gələnlər) barəsində cinayət işi qaldıracağını da deyib.

   Ən yaxşı müdafiə hücumdur. Sabirabad rayonunun rəhbərliyi bilir ki, bu addımı atmasalar, qabaqdangəlmişlik eləməsələr, "sel qaçqınları"nın ayaqları yer alar. Bu gün bir tələbləri yerinə yetirilsə, sabah başqa iddia ilə çıxış edərlər.

   Nəsə, "sel qaçqınları" əvvəllər verilən vədlərdən bezmişdilər, indi də hədə-qorxulardan zara gəliblər. Belə getsə, kompensasiya tələblərindən də geri çəkiləcəklər...