Ermənistan Müdafiə Nazirliyinin hərbi hissələrindən birində insident baş verib. APA-nın "Novosti-Armeniya" agentliyinə istinadən verdiyi məlumata görə, odlu silahın tətbiq edildiyi insident nəticəsində ölənlər var.

   Ermənistan Müdafiə Nazirliyinin rəsmi açıqlamasında deyilir ki, hadisə iyulun 28-də N saylı hərbi hissədə baş verib: "Fakt üzrə cinayət işi qaldırılıb, istintaq aparılır. Silahlı Qüvvələrin rəhbərliyi ölənlərin yaxınları və qohumlarına dərin hüznlə başsağlığı verir və bildirir ki, müvafiq qurumlara insidentin bütün təfərrüatlarını aydınlaşdırmaq tapşırılıb".

   Nazirlik insidentin səbəbləri və ölənlərin sayı barədə məlumat verməyib.

   Helsinki Assosiasiyasının Vanadzor nümayəndəliyinin rəhbəri Artur Sakunts "Armenia Today" agentliyinə bildirib ki, baş vermiş silahlı insident nəticəsində 5 hərbçi həlak olub.

   Ölənlərdən 4-ü zabit, 1-i isə əsgərdir.

   Hüquq müdafiəçisi bunu ilkin məlumat kimi təqdim edib və əlavə dəqiqləşdirməyə ehtiyac olduğunu vurğulayıb. Onun sözlərinə görə, zabitlər postda yatmış əsgərləri oyadaraq, onları təhqir etməyə və alçaltmağa başlayıblar. Əsgərlərdən biri buna dözməyərək, avtomatı götürüb, atəş açmağa başlayıb, sonra isə özünü vurub. "Bundan artıq heç nə deyə bilmərəm. İnformasiyanı dəqiqləşdirməyə davam edirəm", - deyə Sakunts bildirib.