Hazırda dünyada 33 milyondan çox HİV-ə yoluxmuş insan yaşayır. Hər gün 6800-dən artıq insan HİV-ə yoluxur, 5700-dən çox insan isə AİDS xəstəliyindən dünyasını dəyişir. Azərbaycan HİV-ə yoluxma səviyyəsi aşağı olan ölkələr sırasında olmasına baxmayaraq, burada epidemiya əsasən yüksək riskli qrupa aid olan inyeksion narkotik istifadəçiləri arasında yayılıb.

   Respublika Narkoloji Dispanserinin şöbə müdiri Afət Məmmədovanın "Ekspress"ə bildirdiyinə görə, hazırda dispanserdə 23927 xəstə qeydiyyatdadır ki, onlardan da 18 mini daimi müalicə götürən, 5927-i isə profilaktik müalicə alanlardır. Qeydiyyatda olan xəstələrin 420 nəfəri qadındır (onlardan 5 nəfəri 17 yaşına kimi, digərləri isə 18-40 yaş arasında olanlardır). Həmsöhbətim hesab edir ki, göstərilən rəqəmləri nəzərə alsaq, Azərbaycanda HİV-ə yoluxma təhlükəsi daha çoxdur.

   QİÇS-lə Mübarizə Mərkəzinin ictimaiyyətlə əlaqələr və profilaktika şöbəsinin rəhbəri Səbinə Babazadənin sözlərinə görə, Azərbaycanda təkcə 2010-cu ilin 6 ayı ərzində aşkar olunan HİV-ə yoluxma hallarının 58,5 faizi, ümumilikdə isə 1987-ci ildən bu il iyulun 1-nə qədər olan dövrdə bütün yoluxma hallarının 62,5 faizi inyeksion narkotik istifadəsi nəticəsində baş verib. Belə ki, 2010-cu ilin birinci yarısında Azərbaycanda 248 yeni HİV-ə yoluxma faktı aşkar olunaraq qeydiyyata alınıb. Onlardan 240 nəfəri (96,8 faiz) Azərbaycan vətəndaşı, 8-i əcnəbi vətəndaşdır. Bu dövr ərzində QİÇS mərhələsinə keçənlərin sayı 104 nəfər (101 azərbaycanlı), HİV-dən dünyasını dəyişənlərin sayı 22 nəfər (21 azərbaycanlı) olub. Qeyd olunan 240 nəfər Azərbaycan vətəndaşından 52-si Bakıda və Abşeron rayonunda, 186-sı ölkənin digər 33 inzibati ərazisində qeydiyyatda olan şəxslərdir. Xəstəlik daşıyıcısı olan 42 nəfər bu virusa Azərbaycandan kənarda yoluxub.

   Qeyd edək ki, bu ilin birinci yarısının yekunlarına görə, ən çox HİV-ə yoluxma halları Şirvan-Hacıqabul rayonlarının payına düşür. Həmsöhbətim bunu rayonlarda əhalinin maariflənmə işinin zəif olması əlaqələndirir. "Əhali bölgələrdə məlumatsız olduğu üçün nə edəcəklərini bilmirlər. Məhz bu üzdən yoluxmaların ən çox hissəsi bölgələrin payına düşür".