Standartlaşdırma, Metrologiya və Patent üzrə Dövlət Komitəsinin (SMPDK) 1 saylı Ərazi Dövlət Nəzarəti İdarəsinin əməkdaşları Bakı şəhəri, Teymur Əliyev,54 ünvanında yerləşən "Avto Baku in Gründüng Ltd." MMC-yə məxsus ticarət müəssisəsində araşdırma aparıblar.

   Dövlət Komitəsindən "APA-Economics"ə verilən məlumata görə, araşdırma zamanı müəssisənin rəhbəri Çakar Özkan İsmayıl oğlu və digərləri yoxlamaların və digər nəzarət tədbirlərinin keçirilməsinə maneçilik törədib və həmin məqsədlə onların qanuni tələblərini yerinə yetirməyiblər. Bununla əlaqədar, İnzibati Xətalar Məcəlləsinin 317.1 maddəsinə əsasən "Dövlət standartlarının tələblərinə riayət edilməsinə dövlət nəzarətini, habelə dövlət metroloji nəzarətini həyata keçirən müvafiq icra hakimiyyəti orqanının vəzifəli şəxsləri tərəfindən səlahiyyətləri daxilində yoxlamaların və digər nəzarət tədbirlərinin keçirilməsinə maneçilik törədilməsinə və ya həmin məqsədlə səlahiyyətli şəxslərin qanuni tələblərinin yerinə yetirilməməsinə görə" müəssisənin rəhbəri Çakar Özkan İsmayıl oğlu barəsində inzibati xəta haqqında protokol tərtib olunub, müəssisə rəhbəri 4 min manat məbləğində cərimə olunub.

   Bununla yanaşı, müəssisə tərəfindən idxal olunan və keyfiyyəti, təhlükəsizliyi müvafiq sertifikatlarla təsdiq olunmayan malların rəsmiləşdirilməməsi barədə məktub Dövlət Gömrük Komitəsinə göndərilib.

   Çakar Özkan "Turan" bildirib ki, avtohissələr icbari sertifikatlaşma tələb etməsə də, şirkət son 3 ildə 18 Avropa ölkəsindən alınan malları sertifikatlaşdırıb. "Bu sertifikat üçün şirkət 350 manat ödəyib. SMPDK icbari sertifikatlaşma tələb edib və 2000 manat istəyib", - deyə Azərbaycanda 18 ildir çalışan türkiyəli sahibkar bildirib.

   Özkan həmçinin deyib ki, SMPDK əməkdaşları İqtisadi İnkişaf Nazirliyinin təmsilçilərinin iştirakı olmadan sahibkarlıq subyektlərində yoxlama apara bilməz. Üstəlik, qurumun əməkdaşları Nəzarət Kitabında yoxlama barədə qeydiyyat aparmayıb.

   Dövlət Komitəsinin mətbuat katibi Fazil Talıblı sahibkarın ittihamını rədd edib və bildirib ki, Nazirlər Kabinetinin 1 iyul 1993-cü il tarixli qərarı ilə ehtiyat hissələr mütləq sertifikatlaşdırılmalıdır.