"General Electric" korporasiyası İraqın rəsmi şəxslərinə rüşvət verməklə bağlı ABŞ hökumətinin ittihamlarından qurtulmaq üçün $23,5 milyon ödəməyə razılıq verib.

   ABŞ Qiymətli Kağızlar Komissiyasının (SEC) ittihamları GE ilə bağlı olan dörd şirkətlə əlaqədardır.

   "The New York Times" bildirir ki, GE-nin İraqa su təmizlənməsi və səhiyyə müəssisələri üçün avadanlıqların satılması ilə bağlı müqavilələri əldə etməsinə nail olmaq üçün həmiin şirkətlər İraqın Neft və Səhiyyə nazirliklərinin əməkdaşlarını rüşvətlə ələ almaqda suçlanırlar.

   GE həmin avadanlığı BMT-nin "Ərzaq əvəzinə neft" proqramı çərçivəsində satıb. 1996-2003-cü illərdə həyata keçirilən həmin proqram əslində İraqa qarşı sanksiyalardan ibarət idi. SEC bildirir ki, GE-nin şirkətləri 2000-2003-cü illərdə qanunsuz sxemləri reallaşdırıblar.

   Küveyti işğal edəndən sonra sərt iqtisadi sanksiyalarla üzləşmiş İraq hakimiyyəti ölkə ərazisindəə çıxarılmış xam nefti "Ərzaq əvəzinə neft" proqramı çərçivəsində sataraq ərzaq və dərman preparatları alırdı.

   2005-ci ildə BMT-nin xüsusi komissiyası təhqiqat apararaq müəyyənləşdirdi ki, proqramda iştirak edən şirkətlər Səddam Hüseyn hakimiyyətinə iri məbləğdə rüşvətlər verərək məhsulların məhz onlardan satın alınmasına çalışırdılar.