Avropanın ən zəngin iş adamlarından biri olan alman Teodor Albrext 88 yaşında dünyasını dəyişib. "Aldi" ərzaq marketləri-diskaunterlər şəbəkəsinin banisi Essendəki malikanəsində iyulun 24-də ölsə də, bu barədə yalnız 4 gün sonra rəsmi açıqlama verilib. Multimilyarder iş adamının ölümünün səbəbləri barədə heç nə deyilmir.

   ZDF bildirir ki, Teodor Albrext və onun qardaşı Karl ərzaq alverinə İkinci Dünya müharibəsindən sonra başlayıblar. Müharibə bitəndən sonra doğma Essen şəhərinə dönən qardaşlar ailələrinə məxsus kiçik dükanı işlətməyə başlayıblar. 1950-ci ildə isə Albrext qardaşlarının artıq 13 ərzaq dükanı vardı.

   "Aldi", yəni "Albrecht Discount" adlanan ilk marketlər issə Almaniyada 1960-cı illərin sonlarında fəaliyyət göstərməyə başlayıb.

   "Aldi" marrketləri çox məhdud çeşiddə gündəlik tələbat mallarını olduqca sərfəli qiymətlərlə satmaqla məşğuldu.

   İndi isə təkcə Almaniyada 4 mindən artıq "Aldi" marketi var. Albrext qardaşları ABŞ-da 1100 marketə malik "Trader Joes" şəbəkəsinə də malikdilər.

   Karl və Teodor Albrext qardaşları mütəmadi olaraq Almaniyanın ən zəngin iş adamlarının reytinqinə başçılıq edir, habelə Avropanın və dünyanın ən zəngin şəxslərindən sayılırdılar.

   "Forbes" jurnalının hesablamalarına görə, Teodor Albrext $16,7 milyard, onun qardaşı Karl isə $23,5 milyardlıq sərvətə malikdi.

   Albrext qardaşları həddən artıq qapalı, adlarının kütləvi informasiya vasitələrində çəkilməsini istəməyən adamlar kimi ad çıxarıblar.

   Onların şirkətləri də media ilə sıx əlaqələr qurmayaraq fəalliyyətləri barədə məlumatları açıqlamırlar.

   Almaniyanın kütləvi informasiya vasitələrində Teodor Albrextin son şəkilləri yoxdur.

   1971-ci ildə Teodor Albrext oğurlanmışdı. Cinayətkarlar onu 17 gün saxlayaraq 7 milyon marka alandan sonra buraxmışdılar.

   Teodor Albrext Essen şəhər qəbristanlığında dəfn olunub.

   Onun dəfn mərasimi iyulun 28-də çox qapalı şəkildə keçirilib.