Ədliyyə naziri yanında penitensiar sistemə nəzarət üzrə İctimai Komitənin koordinatoru Əliməmməd Nuriyev və qurumun üzvü Çingiz Qənizadə Penitensiar Xidmətin Qobustan qəsəbəsində yerləşən həbsxanasında olublar. Bu barədə APA-ya məlumat verən Çingiz Qənizadə həbsxanadakı məhkumlarla görüşdüklərini deyib: "Həbsxanada saxlanılan ömürlük məhbus Zaur Həziyevlə görüşdük. Görüşümüzün əsas məqsədi Zaur Həziyevə baş çəkmək və bir qədər əvvəl orada dünyasını dəyişən Nemət Əhmədovun ölümünün səbəbini araşdırmaqdan ibarət idi. Nemət Əhmədovun kamera yoldaşlarını təkbətək dindirdik və məlum oldu ki, bu, təbii ölümdür. Burada hansısa işkəncədən söhbət gedə bilməz".

   Hüquq müdafiəçisi ömürlük məhbus Zaur Həziyevin aclıq aksiyası keçirdiyini də bildirib: "Zaur Həziyev müalicə müəssisəsinə köçürülməsini istəyir. Aclıq aksiyasını dayandırmağı xahiş etsək də, o, aksiyanı müalicə müəssisəsinə köçürüldükdən sonra dayandıracağını söylədi. Bizimlə həbsxanaya gedən Ədliyyə Nazirliyi Penitensiar Xidmətinin Tibb İdarəsinin iki həkimi onu müayinədən keçirdilər. Səhhəti olduqca ağırdır. Dediyinə görə, ötən ayın 26-dan aclığa başlayıb. Lakin rəsmi olaraq bu ayın 20-dən o, kamerasına qoyulan yeməkdən imtina edib və bu da aktlaşdırılıb".

   Hüquq müdafiəçisi Zaur Həziyevin Müalicə Müəssisinə köçürülməsi ilə bağlı Ədliyyə Nazirliyinə müraciət edəcəklərini də vurğulayıb.