Ağır Cinayətlərə Dair İşlər Üzrə Hərbi Məhkəmədə dələduzluqda və digər əməllərdə ittiham olunan keçmiş müstəntiqin cinayət işi üzrə məhkəmə baxışı başlayıb. APA-nın məlumatına görə, hakim İslam Neymanovun sədrliyi ilə keçən prosesdə prokuror ittiham aktını elan edib.

   İttiham əsasən, Lənkəran Rayon Hərbi Prokurorluğunun keçmiş müstəntiqi Qabil İsmayıl oğlu Əlizadə tutduğu mövqedən istifadə edərək Cinayət Məcəlləsinin 177.2.2-ci (oğurluq təkrar törədildikdə), 177.2.3-cü (oğurluq yaşayış sahəsinə, habelə binaya, anbara və ya başqa saxlanc yerlərinə qanunsuz daxil olmaqla törədildikdə), 177.2.4-cü (xeyli miqdarda ziyan vurmaqla törədildikdə), 178.2.2-ci (dələduzluq təkrar törədildikdə), 178.2.3-cü (dələduzluq şəxs tərəfindən öz qulluq mövqeyindən istifadə etməklə törədildikdə), 178.2.4-cü (dələduzluq xeyli miqdarda ziyan vurmaqla törədildikdə), 178.3.2-ci (dələduzluq külli miqdarda ziyan vurmaqla törədildikdə ) və 341.1-ci (hakimiyyətdən sui-istifadə etmə, hakimiyyət həddini aşma və ya hakimiyyətdən istifadə etməmə) maddələri ilə tövsif olunan cinayət əməllərini törədib.

   Belə ki, Q.Əlizadə vəzifə səlahiyyətlərini aşaraq vətəndaşlardan aldatma yolu ilə pul alıb. Yaxın münasibətdə olduğu şəxslərin evindən isə qızıl-zinyət əşyaları oğurlayıb.

   Məhkəmədə ifadə verən Qabil Əlizadə Cinayət Məcəlləsinin ona qarşı irəli sürülən 177-ci maddəsi ilə özünü təqsirli bilməyib. Lakin dələduzluq ittihamını qəbul edib.

   Sonra məhkəmə prosesi zərərçəkən və şahidlərin ifadələri ilə davam etdirilib.

   Proses avqustun 5-də davam etdiriləcək.