Argentina yığmasının sabiq baş məşqçisi Dieqo Maradona ölkənin Futbol Assosiasiyasının (AFA) rəhbərliyini yalan ilə xəyanətdə suçlayıb. Buenos-Ayresdə keçirdiyi mətbuat konfransında danışarkən Maradona deyib ki, AFA-nın prezidenti Xulio Qrondona ilə yığmanın baş meneceri Karlos Bilardo onu aldadıblar: "Cənubi Afrikada keçirilən dünya çempionatının 1/4 finalında Almaniya millisinə 1:4 hesablı məğlubiyyətdən dərhal sonra Qrondona futbolçuların və assosiasiya üzvlərinin yanında deyib ki, məşqçinin işindən razıdı, onun yerində qalmasını istəyir. Amma biz vətənə dönəndən sonra AFA prezidenti komandanın məşqçilər qərargahından yeddi nəfərin getməsini tələb etdi. Bu tələblə təbii ki, razılaşa bilməzdim. Deyilənlərə etiraz edərək baş məşqçi vəzifəsindən istefa verdim. Bilardoya gəldikdə isə... Hamı Argentina yığmasının məğlubiyyətinə təəssüflənəndə baş menecer məni vəzifəmdən kənarlaşdırmaq üçün gizlincə çalışırdı".

   AFA rəhbərliyinin fəaliyyətindən danışarkən Maradona bildirib ki, bu qurumun bossları şərəf və mənəviyyatla bağlı başqa qanunlarla yaşayırlar. Bunu söyləyəndən sonra Maradona mətbuat konfransının başa çatdığını deyib. Jurnalistlərin əksəriyyəti onu alqışlarla yola salıb. Maradonanın bəyanatına Karlos Bilardo heç bir şərh verməsədə, Argentina Futbol Assosiasiyasının prezidenti Xulio Qrondona sabiq baş məşqçinin hansı xəyanətdən bəhs etdiyini anlamadığını söyləyib: "Məşqçilər qərargahının bir neçə üzvünü dəyişməyi təklif edərkən Maradonanı vəzifəsindən uzaqlaşdırmaq yox, yığmada müsbət dəyişikliklərə nail olmaq istəyirdik".