Yay mövsümlərarası transfer dönəmində heyətini Quti, Hilbert və Rikardu Kuaresma ilə gücləndirən "Beşiktaş" indi də "Aston Villa"nın ucaboylu forvardı Con Karyu ilə danışıqlar aparır. Birmingemlilərin də hücumçu ilə vidalaşacağı istisna olunmur. Karyu son vaxtlar əsas heyətdə çox nadir hallarda meydana çıxır və vaxtını ehtiyat oyunçular skamyasında keçirir. "Qara qartal" heyətindəki legionerlərin sayını bəlli səviyyədə saxlamaq üçün bəzi oyunçularla vidalaşmağa da hazırlaşır. Baş məşqçi Bernd Şusterin təklifi ilə klub rəhbərliyi Tello, Holosko və Finklə yolları ayırmağı nəzərdə tutub. İlk olaraq Tello heyətdən uzaqlaşdırılıb.

   Siyah-bəyaz komandanın "Ayntraxt"dan azad agent statusu ilə aldığı Mixael Finki də "Cenoa"ya vermək istədiyi bildirilir. Daha doğrusu, ötən mövsüm Matteo Ferrarini genuyalılardan 4,5 milyon avroya alan "Beşiktaş" həmin anlaşma çərçivəsində hələ ödəmədiyi pulun müqabilində Finki "Cenoa"ya göndərmək fikrindədi. Eyni zamanda Ferrarinin də durumu yaxşı deyil. Onun Yunanıstan və İtaliyadakı klublardan birinə satıla biləcəyi vurğulanır.