Barselona şəhərində atletika üzrə keçirilən şəxsi Avropa çempionatı davam edir. Bu gün çempionatda daha bir növdə - 3000 metr məsafəyə qaçışda medal dəstinin taleyi həll ediləcək. Həmin yarışda Azərbaycan yığmasının efiopiyalı legioneri Layeş Abdullayeva da mübarizə aparacaq. Təsnifat mərhələsində həmin məsafəni 9:40,42 dəqiqə nəticəylə başa vuraraq final mərhələsində iştirak etmək hüququ qazanan atletimiz həlledici mərhələdə isə medallar uğrunda Yuliya Zardunova, Lyubov Xarlamova, Violetta Frankeviç (hamısı Rusiya), Katarjina Kovalka (Polşa), Marta Dominqes, Zulema Fuentes-Pila (hər ikisi İspaniya), Oksana Juravel (Moldova), Ankut Bobsel, Sofii Duarte (hər ikisi Fransa), Fionnula Britton (İrlandiya) və Hati Dinlə (Böyük Britaniya) birgə qaçış cığırına çıxacaq.