Dünən Moskvadakı "Krılatskoe" avarçəkmə kanalında yeniyetmə (18 yaşlılar) və gənclər (23 yaşlılar) arasında avarçəkmənin kayak və kanoe növləri üzrə Avropa çempionatı başlanıb. 39 ölkədən olan idmançıların qatıldıqları turnirdə ölkəmizi baş məşqçi Yohan Tcyulkenin çalışdırdığı 5 idmançı təmsil edir ki, onlardan üçü yeniyetmələr, ikisi isə gənclər arasında çıxış edir. Yeniyetmələrin yarışında həmyerlilərimizdən Radoslav Kutsev, Andrey Kraytor və Tamerlan Mustafayev, gənclər arasında isə xoşbəxt cütlük hesab edilən Mirnazir Cavadov - Rüfət Vəlizadə dueti iştirak edəcək. Avqustda Sinqapurda keçiriləcək Yeniyetmələrin I Yay Olimpiya Oyunlarına qatılacaq Radoslav Kutsev Moskvada 1 nəfərlik kanoe qayıqla 1000 metr məsafəyə yürüşdə çıxış edəcək.

   2009-cu ildə elə bu şəhərdə keçirilən lisenziya xarakterli turnirdə iştirak edərək Sinqapura lisenziya qazanan, ancaq sonradan təvəllüdünə görə Yeniyetmələrin I Yay Olimpiya Oyunlarında iştirak etmək imkanını itirən Andrey Kraytor bu çempionatda 1 nəfərlik kanoe qayıqla 200 və 500 metr məsafələrə yürüşdə qüvvəsini sınayacaq. Tamerlan Mustafayevə gəlincə isə, o 1 nəfərlik kayak qayıqla 200 metr məsafəyə yürüşdə iştirak edəcək. Gənclərin yarışında iştirak edəcək Mirnazir Cavadov - Rüfət Vəlizadədən ibarət cütlüyümüz isə 2 nəfərlik kayak qayıqla 500 və 1000 metr məsafələrə yürüşdə özlərini sınayacaqlar. Avropa çempionatı avqustun 1-də başa çatacaq.