ABŞ-ın sabiq prezidenti Bill Klinton və hazırda dövlət katibi postunu tutan xanımı Hillari Klinton prezident Barak Obamanı qızlarının toyuna dəvət etməyiblər.

   Lent.az-ın "Hindustan Times" qəzetinə istinadən verdiyi məlumata görə, Barak Obama bunu ABC telekanalında efirə çıxan "The View" proqramında söyləyib.

   ABŞ prezidenti toya dəvət edilməmə səbəbi ilə bağlı versiyasını da dilə gətirib: "Düşünürəm ki, Hillari və Bill qonaqların dəvət edilməsi məsələsini tamamən qızları Çelsinin və onun gələcək ərinin ixtiyarına buraxmaq istəyirlər". Barak Obama zarafatla onu da deyib ki, bir toyda iki prezident istəmirlər.

   Qeyd edək ki, toya Bill Klintonun prezidentliyi dövründə vitse-prezident postunu tutmuş Albert Qor, o cümlədən Barbara Streisand, Steven Spielberg, Ted Turner kimi məşhur şəxslər də çağırılmayıblar. Çelsi Klinton biznesmen nişanlısı Marc Mezvinski ilə iyulun 31-də nikah masasına əyləşəcəklər.