Fransa hökuməti 300-ə yaxın qaraçı düşərgəsini evakuasiya etmək və digər Avropa Birliyi ölkələrindən qeyri-leqal yolla gələn qaraçıları ölkədən çıxarmaq niyyətindədir. "Reuters" agentliyinin məlumatına görə, bunu prezident Nikolya Sarkozinin çağırışı ilə Nazirlər Kabinetinin fövqəladə iclasından sonra daxili işlər naziri Bris Ortfye söyləyib. Nazirlər Kabinetinin iclasında Luar vadisindəki vəziyyət müzakirə olunub. Bu vadidə polis gizlənməyə çalışan qaraçı qıza atəş açıb, nəticədə qaraçılarla polislər arasında qarşıdurma baş verib.

   Nikolya Sarkozi bəyan edib ki, bütün günahkarlar sərt cəzalandırılacaq. O, qeyri-leqal immiqrant olan bütün qaraçıların da ölkədən çıxarılması barədə göstəriş verib. Nikolya Sarkozi qaraçı düşərgələrini narkoticarətin, uşaq əməyindən qul kimi istifadənin və fahişəliyin mənbəyi adlandırıb.

   Fransa hökumətinin hesablamalarına görə, ölkədə əsasən 2007-ci ildə Avropa Birliyinə daxil olmuş Rumıniya və Bolqarıstandan gəlmiş 15 min qaraçı var.