14:45 23-07-10
UEFA Avropa Liqasının ikinci təsnifat oyununda "Bakı" klubu səfərdə Çernoqoriyanın "Buduçnost" komandası ilə qarşılaşıb. Komandamız oyuna 3:0 hesablı texniki məğlubiyyətlə çıxıb. Baxmayaraq ki, Bakıda keçirilən oyun "Bakı"nın 2:1 hesablı qələbəsi ilə başa çatmışdı.

   

   Çernoqoriyadakı oyun da komandamızın qələbəsi ilə bitib. Qolları 28-ci dəqiqədə Aleksandar Şoliç, 42-ci dəqiqədə isə Jaba vurub. Lakin Çernoqoriya klubu 64-cü dəqiqədə Nenad Beqoviçin qolu ilə hesab arasındakı fərqi azaldıb. Oyun bu hesabla başa çatıb və növbəti mərhələyə "Buduçnost" vəsiqə qazanıb.

   

   Qeyd edək ki, Avropa Liqasının "Bakı"nın "Buduçnost"la ilk oyununun nəticəsi ləğv olunub. Komandamızın iyulun 15-də Tofiq Bəhramov adına Respublika stadionunda 2:1 hesabı ilə qalib gəldiyi görüşün nəticəsi texniki məğlubiyyətlə əvəzlənib. Buna "zolaqlılar"ın heyətində kamerunlu legioner Joel Epallenin meydana çıxması səbəb olub. Belə ki, 2006/07 mövsümündə "İraklis"də (Yunanıstan) çıxış edən Joel UEFA kubokunun "Visla" (Polşa) ilə ilk görüşündə qırmızı vərəqə alıb. 2006-cı il sentyabrın 14-də keçirilən ilk qarşılaşmanın 71-ci dəqiqəsində cəzalanan afrikalı futbolçu meydandan birbaşa qovulduğu üçün ən azı 2 oyunluq diskvalifikasiya olunub. Polşalılarla cavab matçını buraxsa da, yarımmüdafiəçinin cəzası tam bitməyib. "İraklis" iki oyunun nəticəsinə əsasən (Polşada 1:0 hesablı qələbə, Salonikidə 0:2 hesablı məğlubiyyət) mübarizədən kənarda qaldığından, Joelin cəzası hələ də qalmaqdadır. Futbolçu sonradan "İraklis"dən "Bohum"a keçsə də, almanlar axırıncı dəfə qitə miqyaslı turnirlərdə 2004/2005 mövsümündə mübarizə aparıb. UEFA ötən gün "Bakı" klubuna göndərdiyi faksda qərarını açıqlayıb. Qərara görə, təmsilçimizə 0:3 hesablı məğlubiyyət verilib. Bundan başqa, bakılılar 3 min avro cərimələnib.

   

   EKSPRESS.AZ