11:15 27-07-10
Avropa İttifaqı (Aİ) Azərbaycanın işğal altında olan Dağlıq Qarabağın statusu üzrə hər hansı bir referendumun keçirilməsini vaxtından tez hesab edir. Bu barədə Rusiyanın "İnterfaks" agentliyinə Aİ-nin Cənubi Qafqaz üzrə xüsusi nümayəndəsi Piter Semnebi bəyan edib.

   

   Onun sözlərinə görə, Dağlıq Qarabağın statusu üzrə hər hansı bir səsvermə yalnız uzun bir prosesdən sonra baş verə bilər. "Hazırda bütün tərəflər üçün zəmanət yaratmaqdan ötrü prosesin necə inkişaf etdirilməsi prosesi barədə razılıq əldə etmək lazımdır", - deyə o bildirib.

   

   Semnebi xatırladıb ki, problemin nizamlanma prinsipləri artıq ATƏT-in Minsk qrupunun həmsədrləri tərəfindən səsləndirilib. "Düşünürəm ki, bu, nizamlanma üçün əla bazadır və Avropa İttifaqı hər iki tərəfi onu dəstəkləməyə çağırır", - deyə Semnebi əlavə edib.

   

   O həmçinin etiraf edib ki, Türkiyə və Ermənistan arasında münasibətlərin normallaşdırılması prosesi Dağlıq Qarabağ prosesinin nizamlanma gedişinə təsir edir.

   

   "Bu proseslər arasında rəsmi bağlılıq yoxdur. Eyni zamanda inkar etmək olmaz ki, bu proseslərdən birində istənilən halda baş verən hadisələr, etibar mühitinə təsir göstərir və bunu nəzərə almaq lazımdır", - deyə Semnebi bildirib.

   

   EKSPRESS.AZ