12:09 27-07-10
Meyiti Ermənistan tərəfində qalan Milli Ordumuzun şəhid hərbçisi, Azərbaycanın Milli Qəhrəmanı Mübariz İbrahimovla bağlı rəsmi Bakı danışıqları davam etdirir. Azərbaycanın insan hüquqları üzrə müvəkkili, ombudsman Elmira Süleymanova ANS-ə açıqlamasında bəyan edib ki, hələlik heç bir nəticə əldə olunmayıb. Elmira Süleymanova Milli Qəhrəmanın ailəsinə də baş çəkəcəyini söyləyib.

   

   "Beynəlxalq Qırmızı Xaç Komitəsinin yeni nümayəndəsini qəbul etmişəm. Əsas odur ki, hər zaman ədalət həmişə insanpərvərlik hissinin tərəfində olsun. Nə qədər qəddarlıq, işgəncə olsa da, Mübarizin göstərdiyi şücaətə, qəhrəmanlığa gördünüz ki, ölkə prezidenti dərhal münasibət bildirdi. Mübariz İbrahimova dərhal Milli Qəhrəman adı verildi. İnşallah, onun meyiti Vətənə qaytarılar və dəfn mərasimi qurular. Mən bu gün Müdafiə Nazirliyinə müracitə edəcəm ki, Mübarizin şəkilləri olan plakatlar, onun göstərdiyi şücaət, Milli Qəhrəman adının verildiyi plakatlar bütün hərbi hissələrdə olsun",- deyə Elmira Süleymanova bildirib.

   

   EKSPRESS.AZ