12:40 28-07-10
Kəskin istilər ölkə ərazisində meşə yanğınlarına səbəb olub. Hazırda Şabranın 7 kəndində meşə yanğınları davam edir. Bu gün şimal bölgəsində küləklə müşahidə olunan isti hava Şabran rayonunun Xəlfələr kəndi ərazisində başlayan yanğının qısa zamanda rayonun digər kəndlərinin ərazisinə yayılmasına səbəb olub.

   

   Şabran rayon icra hakimiyyətinin başçısı Novruz Novruzovun verdiyi məlumata görə, yanğın 7 kəndi əhatə edir. Təqribən 1000 hektara yaxın əkin, biçənək, bağ sahələri yanıb, yanğın Zeyvə kəndinin yaxınlığındakı meşə massivinə doğru irəliləyir.

   

   Yanğının söndürülməsi üçün rayon sakinləri, rayonun hüquq-mühafizə orqanlarının əməkdaşları, FHN-in Şimal regional bölməsinin qüvvələri səfərbər edilib.

   

   Fövqəladə Hallar Nazirliyinin Şimal regional Dövlət Yanğın Nəzarəti İdarəsinin böyük inspektoru Nail Dəmirov yanğın barəsində saat 14:00 radələrində məlumat daxil olduğunu bildirib. Hazırda yanğının qarşısının alınması üçün Şabran rayonundan 4, Siyəzən rayonundan isə 2 yanğınsöndürən maşının yanğın baş verən əraziyə göndərildiyini bildirilir.

   

   Yanğının baş verdiyi sahələrin dağlıq ərazi olduğundan alovun qarşısının alınmasında qismən çətinlik yaranıb. Hələlik baş verən yanğınlar nəticəsində heç kimin xəsarət almadığı bildirilir. Yanğın ümumilikdə 7 kəndin - Xəlfələr, Sumağoba, Qazma, Pirəbədil, Qorğan, Borbor, Dağ Bilici kəndlərinin ərazisini əhatə edir.

   

   Yanğının söndürülməsi ilə bağlı əməliyyat bu saatlarda da davam etdirilir.

   

   EKSPRESS.AZ