Taksi fəaliyyəti üçün avtomobillər üzrə buraxılış ili ilə bağlı tətbiq olunan məhdudiyyət aradan qaldırıldı. İndən belə taksi fəaliyyəti ilə məşğul olmaq üçün buraxılış ili 5 ildən artıq olan avtomobillərə də icazə veriləcək. Bizdə də narazılıqlar nəticə verərmiş...
Nəqliyyat Nazirliyinin ölkə ərazisində köhnə avtomobillərdən taksi kimi istifadə edilməsinə qoyduğu qadağa yaman sərt qarşılanmışdı. Bu qərar elan olunar-olunmaz, taksi sürücüləri birlik nümayiş etdirərək, etiraz aksiyalarına başlamışdılar. Düzdür, keçirilən başqa aksiyalarda olduğu kimi, şoferlərin də piketləri dağıdılır, onlar da döyülürdülər, bununla belə, sürücülər iki ayaqlarını bir tormoza dirəyib inadlarından dönmürdülər ki, dönmürdülər. Hətta bu cür aksiyaların birində sürücülərdən biri intihara cəhd göstərmişdi. Belə ki, Nəbi adında bir sürücü lezvanı ağzına ataraq, özünü öldürmək istəmişdi. Yaxşı ki, polislərimiz müxalifətin keçirdiyi aksiyalarda şüar səsləndirənlərin səsini kəsmək üçün istifadə etdikləri boğmaq metodundan həmin piketdə yararlana bilmişdilər, yəni sürücünü boğaraq, onun lezvanı udmasına mane olmuşdular.
Görünür, Nəqliyyat Nazirliyində oturanlar sürücülərin bundan da betər üsullara əl atacağından ehtiyatlanaraq, verdikləri qərara dəyişiklik ediblər. Belə ki, dünəndən taksi fəaliyyəti üçün avtomobillər üzrə buraxılış ili ilə bağlı tətbiq olunan məhdudiyyət aradan qaldırılıb. Artıq bundan sonra taksi fəaliyyəti ilə məşğul olmaq üçün buraxılış ili 5 ildən artıq olan avtomobillərə də icazə veriləcək. Qısası, avtomobillərin buraxılış ilindən 5 il keçməsi məsələsi ləğv edilib. Nəqliyyat Nazirliyindən bunu belə izah ediblər: "Elə avtomobillər var ki, bunlar həmin vaxtdan əvvəl buraxılsa da, texniki cəhətdən saz avtomobillərdir və taksi fəaliyyəti üçün texniki tələblərə, lisenziya almaq şərtlərinə cavab verir".
Elə bilirsiniz, nazirlik bu qaydanı qorxusundan dəyişib? Əsla. Nəqliyyat Nazirliyi quruma edilən çoxsaylı müraciətləri, hazırda taksi fəaliyyəti üçün istifadə olunan avtomobillərin bir hissəsinin texniki vəziyyətinin normal olduğunu, eyni zamanda belə avtomobillərin çoxunun yenicə alındığını nəzərə alıb. Di gəl, bu qərar heç də bütün taksi sürücülərinin hirsini soyutmayacaq. Elə bilməyin ki, nazirliyin bu qərarından sonra taksi fəaliyyəti üçün bütün avtomobillərə lisenziya veriləcək. Yox, NN-in dediyi dedikdir: "Keçmiş SSRİ və indiki Rusiya istehsalı olan avtomobillər buraxılış ilindən asılı olmayaraq taksi kimi istifadə olunmayacaq, taksilərin hamısı xarici maşınlar olmalıdır", vəssalam-şüttamam. Bu da son deyil. Lisenziya verilməsi üçün avtomobil texniki cəhətdən saz vəziyyətdə olmalı və lisenziya üçün qoyulan parametrlərə cavab verməlidir: "Maşınların texniki vəziyyəti ciddi surətdə araşdırılacaq, texniki tələblərə cavab verən səviyyədədirsə, ona lisenziya veriləcək".
Nəsə, xarici maşını olanların işi düzəldi. Baxarsınız, indi də sovet maşınıyla "taksovat"lıq edənlər aksiyalara başlayacaqlar. Amma Nəqliyyat Nazirliyinin day güzəştə gedəcəyini heç kim gözləməsin. Nədən ki, belə olsa, sürücülərin ayaqları yer alar...
