İndiyədək müxalifət düşərgəsində səslənən birlik təkliflərini saymaqla bitməz-tükənməz. Amma ortalıqda olanları saymaq üçün bir əlin barmaqları da çoxluq edir. Nədən ki, bizimkilərin təklifləri ancaq və ancaq sözdə olur, işə gələndə hərəsi yaxasını bir qırağa çəkir...

   

   Azərbaycan müxalifətində növbəti birlik söhbəti gedir. Daha doğrusu, təzə-təzə başlayıb. Bu dəfə yeni birlik modeli təklifi "Qarabağ" blokundan gəlib. Blokun təklif etdiyi model gələn il ölkəmizdə keçiriləcək prezident seçkilərinə hesablanıb.

   Bilənlər bilir, bilməyənlərə də qısaca deyim ki, "Qarabağ" blokunu ADP ilə Ümid Partiyası formalaşdırıb. Ötən ilin yayında bir neçə partiyanın ara-sıra yığışıb müxalifətin birliyi ilə bağlı müzakirlər apardığı zaman bu blokda təmsil olunanlar da digər partiyalar kimi hərəkət edərək, danışıqlardan imtina etmişdi. Əgər həmin vaxt danışıqlar baş tutsaydı, indi bəlkə də heç "Qarabağ"ın yeni birlik təklifinə ehtiyac qalmazdı.

   ADP ilə "Ümid"in bloku ölkə müxalifətini bu ilin martından gec olmayaraq, vahid cəbhə formalaşdırmağa çağırır. Blokun bircə istəyi var ki, hər kəsin birləşdiyi qurumlara (burda güman ki, elə ADP ilə "Ümid"in öz bloklarıyla yanaşı, İctimai Palata və Demokratik Cəmiyyət Uğrunda Müqavimət Hərəkatı nəzərdə tutulur) toxunmadan gələn il keçiriləcək prezident seçkisində vahid namizəd və vahid komanda ilə iştirakı şərtləndirən birlik yaradılsın. İllərdi müxalifətdə vahid namizədlə bağlı müzakirlər gedir, amma hər seçki ərəfəsində bu məsələ ortaya atıldığı kimi də, aradan çıxarılır. Əmin ola bilərsiniz ki, bu dəfə də belə olacaq. Demək, "Qarabağ" blokunun səsləndirdiyi təkliflərdən birinin heç müzakirəyə ehtiyacı olmayacaq.

   Blokun təklifləri bununla yekunlaşmır. "Qarabağ"ın üzvü olan partiyaların başbilənləri dövlət strukturlarında təmsilçiliyin birliyə daxil olan partiyalar arasında bərabər bölünməsini, bu ilin 9 ayı ərzində həmin strukturların gələcək islahat paketinin partiyalar tərəfindən hazırlanaraq vahid sənəd halına gətirilməsini, ictimaiyyətə təqdim edilməsini də təkliflər sırasına salıb. Üstəlik blok təklif edir ki, növbəti prezident seçkisində iştirak etmək istəyən partiya sədrləri vahid namizədin öz aralarından seçilməsinin formasını müəyyən etsin, paralel olaraq digər vəzifələri də (məsələn, baş nazir, parlament sədri, Prezident Administrasiyasının rəhbəri, xarici işlər naziri) bölsün. Vəzifə bölgüsü bizim yaralı yerimizdir. Müxalifətdə kimi dindirsən, özünü ən yüksək vəzifəyə layiq biləcək. Vəzifə bölünərkən, dava düşməyəcəyinə heç kəs zəmanət verə bilməz. "Siyasi mənsubiyyət qadağan olunan dövlət strukturlarında təmsilçilik vətəndaş cəmiyyəti nümayəndələrindən təşkil olunsun". Düşərgə təmsilçiləri illərdi vəzifə həsrətiylə alışıb-yanırlar, indi onlar dura-dura, başqalarının kreslolara sahib durmalarını heç bir müxalifətçi sinirə bilməz. Deməli, bu təklif də keçərli sayılmayacaq.

   Öz aramızdır, belə çıxır ki, "Qarabağ" blokunun da birlik təklifi elə təklif olaraq qalacaq...