Vətəndaş Həmrəyliyi Partiyası Siyasi Şurası Fransa Senatının "erməni soyqırımı"nı inkar edənlərə cəza nəzərdə tutan qanun qəbul etməsinə bəyanatla münasibət bildirib. Bu barədə qəzetimizə VHP-nin mətbuat xidmətindən məlumat verilib.

   Bəyanat müəllifləri tarixdə baş verməyən bir hadisəni, "erməni soyqırımı"nın bir sıra dünya ölkələrinin parlamentlərində rəsmən tanınmasını əslində Türkiyəyə siyasi-iqtisadi təzyiqin bariz nümunəsi kimi dəyərləndirir. Sənəddə Fransa Senatının "erməni soyqırımı"nı inkar edənlərə cəza nəzərdə tutan qanunu qəbul etməsinin Türkiyəyə təzyiq olmaqla bərabər, həm də insan hüquq və azadlıqlarının beşiyi olan Fransa və Avropa dəyərlərinə qarşı yönəldiyi vurğulanır.

   "Bu qanun təkcə Türkiyəni deyil, həm də Azərbaycanın dövlətçilik maraqlarını təhdid edir" deyə bildirilən bəyanatda Fransanın ATƏT-in Minsk qrupunun 3 həmsədrindən biri olduğu xatırlanır, Azərbaycan hakimiyyətindən bu ölkənin həmsədrlikdən dərhal uzaqlaşdırılması tələb olunur: "VHP Siyasi Şurası olaraq, Fransa-Azərbaycan siyasi-iqtisadi münasibətlərinə yenidən baxılmasını tələb edirik", - deyə sənəddə qeyd olunur.