Müxalifətdə birlik təklifi ilə çıxış etmək dəb halını alıb. Yuxudan tez duran birlik təşəbbüsü irəli sürür. Düşərgədə o qədər "birlik" deyib, "birlik" eşidirlər ki, bir azdan bu sözü deyəndə özləri də qıcıqlanacaqlar...

   

   Gözlənildiyi kimi də oldu, "Qarabağ" blokunun birlik təşəbbüsünü digər bloklar və partiyalar dəyərləndirmədilər. Ayrı cür də ola bilməzdi, axı. Nədən ki, bizdə heç kəs özgəsinin təklifinə qiymət verməyi sevmir.

   Birlik təkliflərinə başqaları "hə" desələr də, İctimai Palatadakılar "yox" deyəcəklər, buna əmin ola bilərsiniz. Səbəbi də sadədən sadədir, bu qurumdakılar özlərindən başqa kimsəni bəyənmirlər. Deyirlər ki, varsa da İP-dir, yoxsa da, müxalifətdə vahid ünvan da elə bu qurum olmalıdır, vəssalam. Bu səbəbdən də İP-dəkilər başqa birlik təkliflərini yersiz sayırlar.

   İndiyədək müxalifətin birlik təkliflərinə normal yanaşan Azadlıq Partiyasının sədri Əhməd Orucun da üzü Demokratik Cəmiyyət Uğrunda Müqavimət Hərəkatına keçəndən sonra dönüb. Müxalifətin birləşməsi ilə bağlı səslənən fikirlərin artıq dəb halını aldığını deyən Ə.Oruc hamının növbə ilə birləşmədən danışdığını, hamının da birləşməyə mane olan mövqedən çıxış etdiyini bildirir. Bu səbəbdən də artıq "Azadlıq" sədri belə təşəbbüsləri ciddi saymır. DCUMH-nin həmtəsisçisi iş görmək istəyənləri fəaliyyətini ortaya qoymağa çağırır. "Heç bir iş görməyən, bacarığı olmayanlar, ictimai rəydə, gündəmdə qalmaq üçün hamı birləşməlidir" demək artıq xəstə bir hal alıb. Kim kimlə birləşmək istəyir, getsin birləşsin. Düşüb qapı-qapı hamını çağırırlar, ələm gəzdirənlərə oxşayırlar. Nə qədər belə yersiz təşəbbüslər olar?"

   Vallah, Əhməd bəyin birlik təşəbbüsünə niyə belə aqressiv yanaşdığını heç anışdıra bilmədim. Axı, kimsə təklif verməlidir də, təşəbbüs havadan ha olası deyil.

   İndiyədək az təklif eşitməyən, elə özləri də kifayət qədər belə təşəbbüsdə bulunan VİP sədri Əli Əliyev də, deyəsən, birlik ideyalarına barmaqarası baxır. Bəlkə də adamın ağzı belə təkliflərdən yandığından, artıq bu təşəbbüsləri dəyərləndirmir. Bilir ki, onsuz da deyiləcək, söyləniləcək, amma axırda yenə ortaya bir iş çıxarılmayacaq.

   "Qarabağ" bloku kimisə zorla bu danışıqlara cəlb eləmək fikrindən uzaqdır. Blokda təmsil olunan ADP sədri Sərdar Cəlaloğlu deyir ki, əgər müxalifət partiyaları tərəfindən müsbət cavab gəlsə, danışıqlara başlanılacaq: "Əgər birmənalı şəkildə desələr ki, biz bu ideyanı kökündən qəbul etmirik, o zaman heç bir danışıq keçirilməyəcək".

   Nəsə, müxalifətdə adəti üzrə növbəti birlik təşəbbüsü top-tüfənglə qarşılandı. Belə getsə, "Qarabağ" bloku təklifini doğulmamış dəfn edəcək. Görəsən, təklif növbəsi kimindir?!