Qızılın qiymətində artım davam edir. Artıq bir aydır "nəcib metal" ardıcıl bahalaşır. Ötən qısa müddətdə qızılın qiyməti 1547 dollardan 1716 dollara yüksəlib.

   2011-ci ilin dekabrın 29-da xalis qızılın (999,99 əyar) bir Troya unsiyasının (31,1 qram) qiyməti 1547 dollar olmuşdu. Ondan sonra qızılın dəyəri davamlı artmağa başladı. Nəticədə qiymətli metal bir ay ərzində 11 faiz (169 dollar) bahalaşaraq dünən 1716 dollara çatıb. İndi xalis qızılın bir qramı 55 dollardır.

   Qızılın yenidən bahalaşması qlobal iqtisadiyyatla bağlı 2012-ci il üçün verilən pessimist proqnozlarla izah edilir. Hər zaman olduğu kimi, bu dəfə də investorlar çətin anlarda qızılı "sakit liman" - ən təhlükəsiz aktiv kimi görürlər.

   Qeyd edək ki, qızılın qiyməti son iki gün ərzində 50 dollar və ya 3 faiz yüksəlib ki, bunu da mütəxəsislər ABŞ Federal Ehtiyatlar Sisteminin ( FES, Mərkəzi Bank rolunu oynayır) verdiyi qərarla əlaqələndirir.

   FES ABŞ-da faiz dərəcəsini son 3 ildə olduğu kimi 2014-cü ilin sonuna qədər də artırmayacağını bildirib. Hazırda mövcud olan 0-0,25 faizlik səviyyə FES-i qane edir.

   FES-in belə bir açıqlama verməsi dolların məzənnə itkisinə səbəb olub. Həm ABŞ-ın özündə, həm də xarici bazarlarda dolların zəiflədiyi görünür. Avro isə qısa müddətdə ABŞ valyutası qarşısında dəyər qazanaraq $1,29-dan $1,31-dək möhkəmlənib.

   Öz növbəsində, dolların dəyərdən düşməsi qızılın bahalaşmasına əlavə stimul verib.