Avropa Birliyinin İran neftinə embarqo qoymasına rəsmi Tehran qəfil reaksiya verib. Bəlli olduğu kimi, AB üzvü olan ölkələrin xarici işlər nazirlərinin yanvarın 23-də Brüsseldə keçirilən toplantısında İrandan xam neft alışına dərhal qadağa qoyulması qərara alınıb. İndiyədək bağlanmış anlaşmalar üzrə öhdəliklər üçünsə 1 iyul 2012-ci ilədək vaxt qoyulub.

   Tehran isə əks-hucuma keçərək AB-yə üzv ölkələrə neft ixracını dərhal dayandırmaq fikrindədir. Bu həftənin sonunda İran parlamentində AB ölkələrinə neft ixracının dərhal dayandırılması ilə bağlı qanun layihəsi müzakirəyə çıxarılacaq. Böyük Britaniyanın "Financial Tayms" qəzetinə açıqlama verən İran parlamentinin enerji komissiyasının sözçüsü Emad Hüseyni deyib ki, qanun Məclisdə qəbul olunarsa, Avropa Birliyinin İran neftinin idxalına qarşı sanksiyası başlamazdan əvvəl Tehran bu ölkələrə neft ixracını dayandıracaq. O, qanun layihəsinin ən gec bazar günü parlamentdə müzakirəyə çıxarılacağını bildirib.

   İran parlamentinin digər deputatı Naser Sudani isə "Tehran Times"a açıqlamasında deyib ki, Qərbin İran neftinə embarqosu bumeranq effekti verəcək, Avropa ölkələri İran neftini heç nə ilə əvəzləyə bilməyəcəklər və "qara qızıl"ın qiyməti əhəmiyyətli dərəcədə artacaq: "Ona görə də avropalılar İran neftini vasitəçilər vasitəsilə almağa məcbur olacaqlar ki, bu da onların xərclərini kifayət qədər artıracaq".

   "Financial Tayms" yazır ki, İran neft ixracını bu günlərdə dayandırarsa, ən çox iqtisadi böhranla üzləşmiş Yunanıstan, İtaliya və İspaniya kimi ölkələr zərər görəcəklər.

   Ötən il Avropa Birliyi ölkələri İrandan sutkada 600 min barel neft alıb. İranın Avropaya ixrac etdiyi neftin 68%-ni Yunanıstan, İtaliya və İspaniya alır. Yunanıstan neft tələbatının 1/3-ni məhz İran nefti hesabına təmin edir. Tehran neft ixracını dayandırarsa, Yunanıstan daha böyük böhranla üzləşəcək.