"SSRİ dövründə Azərbaycan üçün hazırlanan 004-07 standartında eşşək ətinin növləri, onun qiymətləri və s. məlumatlar göstərilib. Bu standartlar çox təəssüf ki, Azərbaycanda qüvvədədir". Bunu "Ekspress"ə Azad İstehlakçılar Birliyinin (AİB) sədri Eyyub Hüseynov deyib.

   Onun sözlərinə görə, bu standart 1963-cü ildə - Azərbaycan SSRİ-nin tərkibində olduğu dövrdə hazırlanıb. "Yalnız Azərbaycanda eşşək əti yeməli ət kimi nəzərdə tutulub və buna müvafiq standart da tədbiq olunmuşdu".

   Bu standartın indi də mövcud olub-olmamasına gəlincə, həmsöhbətim deyir ki, bununla bağlı dəfələrlə dövlət orqanlarına sorğu göndərib: "Təəssüflər olsun ki, bununla bağlı heç bir cavab almamışam. Cavab almamağım da onu göstərir ki, bu standartlar Azərbaycanda qüvvədədir. Bizdə olan məlumata görə, o vaxt bu standartı hazırlayan şəxs erməni olub və azərbaycanlıları eşşək əti yeyən xalqlar sırasına daxil edib".

   E.Hüseynovun sözlərinə görə, halbuki Azərbaycanda həmişə eşşək əti murdar hesab olunub və heç vaxtı eşşək əti yeyilməyib. AİB sədrinə görə, nəzarət olmayan yerdə hər şey ola bilər. Belə ki, onun sözlərinə görə, bu gün Azərbaycanda eşşək ətindən də murdar ətlər yeyilir. "Bölgələrdə xəstəlikdən ölən heyvanların ətini yığıb Bakıda kolbasa, sosiska sexlərinə gətirən və ya satışa çıxaran insanlar qrupu var".