Son zamanlar uşaqlar arasında qripə yoluxma halları daha da artıb. Belə ki, xəstə uşaqlarda temperatur 38-39 dərəcədən enmir. Həkimlərsə bunu mutasiya olunmuş qrip virusunun yayılması ilə izah edirlər.

   Həkimlər bu qrip növünü əlamətlərinə görə ənənəvi qripdən fərqləndirirlər. "İlkin olaraq xəstənin temperaturu qalxır. Temperaturu aşağı salmaq çətinləşir. Bundan sonra xəstənin boğazında sıyrıntı hissi yaranır. Bir müddət ötdükdən sonra xəstəliyin sağaldığı güman edilsə də əlamətlər yenidən müşahidə edilir".

   Səhiyyə Nazirliyinin mətbuat xidmətinin əməkdaşı Səfayə Əhmədova ANS PRESS-ə Bakıda uşaqların qripin müxtəlif mutasiya olunmuş formalarına yoluxmaları hallarının mövcudluğunu təsdiq edir. "Bəli, belə hallar mövsümlə əlaqədar olaraq mövcuddur. Ancaq bu halın epidemiya xarakteri daşıdığını söyləmək olmaz" deyən S.Əhmədova ölkədəki səhiyyə müəssisələrinin mövsümi infeksion xəstəliklərə qarşı mübarizə aparmaq üçün müvafiq dərman vasitələri ilə təmin edildiyini bildirib.

   Həkim-pediatr Zülfiyyə İbrahimova qripin bu növünün əlamətlərini açıqlayıb. Onun sözlərinə görə, qrip virusuna yoluxmuş şəxslərdə üç gün müddətində səbəbsiz 38-39 dərəcə hərarət müşahidə edilir. Bundan sonra xəstədə ya boğaz ağrısı, ya qusma, ya da öskürək əlamətləri müşahidə edilməyə başlayır. Öskürək quru şəkildə yeddi gün davam etdikdən sonra bəlğəmli öskürəyə çevrilir.

   Z.İbrahimova bu cür qrip virusuna qarşı mübarizə aparmaq üçün uşaqların immunitetinin yüksəldilməsinin vacib olduğunu vurğulayır. Həkim-pediatr bunun üçün uşaqlara immunastimulyator və immuna modulyator tipli immun sisteminin işini qüvvətləndirən preparatların qəbulunu məsləhət görür. Həkim bu cür virus mənşəli qripə yoluxan zaman antibiotik və virusəleyhinə mübarizənin effekt vermədiyini də bildirir. "Qrip virusundan qorunmaq bir qədər çətin məsələdir. Çünki qrip virusu hava-damcı yolu ilə yayılır. Bunun da qarşısını almaq praktiki olaraq mümkün deyil. Virusa qarşı uşaqları yaxşı qidalandıraraq onların immun sisteminin gücləndirilməsi ilə mübarizə aparmaq olar. Bundan başqa hazırkı qidaların tərkibində kifayət qədər vitamin olmur. Buna görə də uşaqların immunetinin artırılması üçün vitamin terapiya tətbiq edilməlidir".

   Bu cür qrip xəstəliyinə yoluxan uşaqların orqanizmində fəsadların qala bilmə ehtimalına gəlincə isə həkim-pediatr bunu istisna edir. Onun sözlərinə görə, vaxtında və düzgün müalicə uşaqlarda virus mənşəli qriplərdən sonra fəsadların qalma ehtimalını sıfıra endirir.