"Bakının təqdim etdiyi bu mərasim həqiqətən də məni çox həyəcanlandırdı. May ayında daha böyük sürprizlər gözləyirəm və bu sürprizləri öz gözümlə görmək istəyirəm. Bakıda "Eurovision -2012" Mahnı Müsabiqəsinin möhtəşəm olacağına inanıram. Bu ölkəyə hər il gəlişimdə turist və qonaq olaraq böyük qonaqpərvərlik görürəm. Mənə elə gəlir ki, azərbaycanlılar bu yarışmadakı qalibiyyətə görə daha həyəcanlı və sevincli görünürlər. Sizin qonaqpərvərliyinizi görüb, hətta azərbaycan dilini öyrənmək istəyərdim, amma məncə, bu, çox çətin olar. Ancaq buna çalışacağam", -bunları APA-ya "Eurovision -2009" Mahnı Müsabiqəsinin qalibi, Bakıda səfərdə olan Aleksandr Rıbak söyləyib.

   İki il öncə Azərbaycana gəldiyini söyləyən ifaçı Bakının bu müddət ərzində çox dəyişdiyini və daha da gözəlləşdiyini bildirib: "Bakıda indi gördüklərimlə öncə gördüklərim tam fərqlidir. Yeni binalar tikilib, şəhər gözəlləşib. Mən Azərbaycanı çox sevirəm".

   Ötən il müsabiqəni izləmək üçün jurnalist kimi akkreditə olunmuş Aleksandr Rıbak bu il də Azərbaycana gələcəyini deyib: "Ötən il jurnalist kimi akkreditə olundum. Amma daha jurnalist kimi akkreditə olunmaq istəmirəm. Düşünürəm ki, mütləq may ayında Bakıda olacağam və müsabiqəni izləyəcəyəm".