Qırğızıstan adına gözəllik yarışına qatılan etnik erməni finalda qırğızları satdı
Qırğız Respublikasının vətəndaşı, Livanda keçirilən “World Next Top Model 2017” beynəlxaq gözəllik yarışının ikincisi Susanna Yeqoryanın hərəkəti qırğızların hiddətinə səbəb olub.
Qırğız saytları etnik erməninin davranışını sosial şəbəkədə ciddi şəkildə müzakirə edirlər. Müzakirələrdə iştirak edənlərdən biri - Dövlət Rabitə və İnformasiya texnologiyaları komitəsinin mütəxəssisi Sabır Kayıkov “Facebook” səhifəsində yazıb: “Onu vətəndaşlıqdan məhrum etmək azdır, ölkəyə gələndən sonra onu öldürmək lazımdır”.
Bir müddət sonra o, “öldürmək lazımdır” ifadəsinə görə üzr istəyərək, əlavə edib: “Ancaq onu vətəndaşlıqdan çıxarmaq vacibdir”.
Sosial şəbəkədə onu “satqın” adlandırıblar.
Qeyd edək ki, Susanna Yeqoryan yarışa Qırğızıstanın təmsilçisi kimi qatılsa da, finalda səhnəyə “Ermənistan” yazılmış lentlə çıxaraq yarışın birinci vitse-missi tituluna layiq görülüb.
“AKİpress” portalının xəbərinə görə, “Qırğızıstan gözəli” müsabiqəsinin təşkilatçısı Tattıbubu Samiddin qızı Yeqoryanın finalda “Ermənistan” lenti ilə çıxış etməsindən şoka düşdüyünü bildirib: “ Mən Susannanı Qırğızıstan adından göndərmişdim, bilməzdim ki, o məni və bizim Qırğızıstanı zərbə altında qoyacaq”.
Onun sözlərinə görə, Susanna Qırğızıstan vətəndaşıdır və “World Next Top Model”in təşkilatçılarının ona “Ermənistan” lenti vermək ixtiyarı yox idi. “Mən buna inana bilmirəm. Güman edirəm ki, təşkilatçılar hansısa səhvə yol veriblər. Hətta bu onun qərarı olsa belə, təşkilatçılar buna yol verməli deyildilər”. - deyə Tattıbubu Samiddin qızı bəyan edib.
Yeqoryan isə İnstaqramda iddia edir ki, Qırğızıstanı satmayıb və finalda milli kimliyi - “Ermənistan” lenti ilə çıxış etmək hüququ olub. Qeyd edək ki, Livanda ermənilərin güclü lobbisi var və “World Next Top Model 2017”nin təşkilatçıları etnik erməninin tərəfini tutublar...
E.Mirzə
