Borc yada düşdü - Qalib İBRAHİMOĞLU
Soyuq hava yaman haqladı bizi. Qəflətən düşən soyuqlar camaatın istiliklə təminatı məsələsini də qabartdı. İndi hamını yalnız bir süal düşündürür: binalardakı istilik sistemləri vaxtından əvvəl istifadəyə verilə bilərmi?
Bizdə qəribə hal yaranıb. Niyə kiminsə kiməsə borcu olanda, bu məsələni vaxtında həll etməyə çalışmır? Məsələn, "Azəriqaz" İB ilə "Azəristiliktəchizat" ASC arasında yaranmış illərin borc problemi hələ də davam edir və görünən odur ki, uzandıqca uzanacaq. Və təbii ki, iki dövlət qurumunun pul davasından adəti üzrə əhali ziyan çəkir.
Bu il soyuq qapımızı yaman tez haqladı. Və belə olan halda da binalardakı istilik sisteminin işə düşməsi məsələsi gündəmə gəldi. Qaydalara görə, "Azəristiliktəchizat" ASC binalara istiliyi noyabrın 15-dən tez verməməlidir. Amma müəyyən istisnalar da var. Məsələn, ASC-nin abonentlərə xidmət şöbəsinin müdiri Rafiq Əliyev "Trend"ə deyir ki, ölkə ərazisində havanın kəskin soyuyacağı təqdirdə binalardakı istilik sistemləri vaxtından əvvəl istifadəyə verilə bilər. "Yaşayış binalarına istiliyin verilməsi qış qrafikinə keçidlə müəyyənləşir. Binalara istiliyin tez verilməsi hava şəraitinin kəskin pisləşməsi ilə bağlı ola bilər. Yəni temperatur 8 dərəcədən aşağı düşərsə və bu cür hava şəraiti 3 gündən artıq davam edərsə, həmin şəraitdə "Azəristiliktəchizat" binalara vaxtından əvvəl istilik verə bilər. Əks halda isə, qış vaxtına keçidi gözləyirik. Hələ ki, temperatur o qədər də aşağı deyil, ona görə də təcili istilik sisteminə keçidi planlaşdırmırıq".
Bundan başqa, məktəblər, uşaq bağçaları, xəstəxanalar və digər müəssisələr arzu edərsə, onlara vaxtından əvvəl istilik verilə bilər. Nədən ki, bu cür obyektlərə istilik müqavilə əsasında verilir və müqavilədə 5 ay nəzərdə tutulur. Amma bu obyektlər hava şəraiti ilə bağlı istiliyin tez verilməsini istəsələr, müqaviləyə dəyişiklik edilməlidir. Bunun üçün isə həmin obyekt əlavə pul ödəməlidir.
Pul demiş, bu arada bəlli olub ki, bəs "Azəristiliktəchizat"ın "Azəriqaz"a nə az, nə azacıq, düz 89,532 mln. manat borcu var. İkinci də bununla əlaqədar birinciyə rəsmi müraciət edib.
Söhbət də illərlə yığılan borcdan gedir. Hansı ki, hər il bu məsələ gündəmə gəlir və iki qurumun pul davası qızışdıqca qızışır. "Azəriqaz" İB-nin ictimaiyyətlə əlaqələr şöbəsinin rəisi İbrahim Kərbəlayev APA-ya deyib ki, bu borcun ödənilməsi "Azəriqaz" üçün böyük əhəmiyyət kəsb edir və bu səbəbdən ödəniş edilməlidir. Yaxşı, bəs borcun olması vətəndaşların mənzillərinin istiliklə təchizatına hansı problemlər yarada bilər? İB-nin sözçüsünü dinləyək: "İlk növbədə borcu olmayan qazanxanalar qazla təmin olunacaq. Çalışacağıq ki, vətəndaşlarımız bundan əziyyət çəkməsin".
Qəribədir, pul davası niyə həmişə qışda yada düşür? Bu probemlə yazda, yayda məşğul olmaq olmazmı?! Yoxsa, bu iki qurum camaata zülm etməkdən ləzət alır?!
